Binulag ng Pangarap
Liwanag ng diwa mula pagkabata
Sa puso at isip kaniyang kinalinga
Ayaw na madumhan ng maling akala
Pilit nilalaban ang panig na tama
Ngunit nang lumaon ang mga panahon
Dahil sa pangarap isipa'y natuon
Ang paninindigang dati'y nakabaon
Ngayo'y nayayanig at ibig itapon
Hilaw na layuning ibig na abutin
Sumira ng budhing dati'y anong hinhin
Sukdulang kumampi sa panig ng dilim
Makamit niya lamang pangarap na bituin
Huwag tayong pabulag sa ating pangarap
Manindigan tayo sa tunay at tapat
Sandaling pagsikat maningning na kislap
Sa pagdapit hapon ay kusang aandap
Ngunit kung sa tama ay maninindigan
Ay mabuting wakas ang kahihinatnan
May pagtitiis at mga pagluha man
Tamis ng tagumpay ang sa 'yo ay laan
