Mag-ingat sa aso (Isang tula)

Sa Filipos tres dos yan ang nasusulat
Sa mga aso daw tayo ay mag-ingat
Panahon na ngayon na tayo'y mamulat
Upang makaiwas at hindi makagat

Isaias singkwenta sais at onse po
Ating mababasa kung sino ang aso
Mga ito pala'y pastor ng demonio
Pawang matatakaw at ligaw ang turo

Sa ating panahon ngayo'y nagsulputan
Ang napakaraming pastor na bulaan
Pagka't noon pa man ang sabi ni San Juan
Maraming bulaan noo'y naglitawan

Mga manloloko ay makikilala
Kahit pa biblia rin ang daladala
Kung iyong titigan ay maamong tupa
Nguni't sa loob ay lobong maninila

Ang tapat at hindi ay makikilala
Sa pamamagitan ng aral niyang dala
Kung ang tinuturo wala sa biblia
Iyan ay bulaan dapat mag-ingat ka

Ang pinangangaral ng mga bulaan

Alimuom, tsismis, kasinungalingan

Hilig na mangalkal ibang pagkukulang

Samantalang mata'y mayroong tahilan

Ang isa pang bagay na kapansin pansin
Mga manloloko'y pera ang hangarin
Ginawang negosyo relihiyon sa atin
Lahat ay may bayad pati panalangin

Ang buhay ng isang tapat at totoo
May mga tiisi't pagsasakripisyo
Naghahanapbuhay noon si San Pablo
Mga pastor ngayon, pasanin ng miyembro

Sa wakas po nito ang masasabi ko
Sa mga aso ay mag-iingat tayo
Pagka't nakataya ay kaluluwa mo
Di na mababawi pag napahamak 'to