Digmaan (Isang tula)

Isa sa tanda na nasa Kasulatan,
Bago dumating ang kapanahunan,
Ay makakarinig ng mga digmaan
Titindig ang bansa’t mga kaharian.

Sa Apocalipsis, kabayong mapula,
Nakasakay dito ay gulo ang dala.
Ang kapayapaa’y aalisin niya,
At magpapatayan ang tao sa lupa.

Ang bagay na ito’y ipinagpauna,
Upang tayong lahat ay magsipaghanda,
Pagka’t mga giyera siyang pasimula
Ng kahirapan na darating sa lupa.

Nakalulungkot lang na mabalitaan
Mga inosente ang natatamaan.
Mga lider-bansang may kapalaluan,
Sa pagsasalita’y hindi mahapayan.

Ang sangkatauha’y hindi na natuto;
Sa mga digmaan ay walang panalo.
Pagka’t bawa’t panig ay mapeperwisyo
Buhay at salapi sa bawat engkuwento.

Kung ang mga ito’y ating masaksihan,
Tayo po ay huwag magulumihanan.
Manatiling laging may kapayapaan,
Pagka’t mayro’ng Dios na inaasahan.

Tinatawag ka Niya (Isang tula)

Ang buhay sa mundo ay mayrong dahilan

Kaya ka nilikha ay may gagampanan

Atas ng Dios Amang Makapangyarihan

Inalam mo na ba kung saan ka laan?

Mayrong mga taong nabuhay sa mundo

Na nangamatay na hindi napagtanto

Ano ang gagawin bilang isang tao

Nangamatay sila sa layaw at bisyo

Ikaw kababayang nakapakinig na

Dalisay na aral ng ating Dios Ama

Sa Kaniyang salita'y tinatawag ka Niya

Ang tinig ng Dios ay dinggin mo sana

Tinatawag ka Niya upang maging lingkod

Sa kalooban Niya tayo ay sumunod

Sa layaw ng buhay tayo'y tumalikod

Sundin ang utos Niya ng buo mong loob

Huwag kang mag-alala kung magagalit man

Mga kaibigan at kamag-anakan

Sapagka't doon mo mapatutunayan

Na mahal mo ang Dios higit kaninoman

Kung nangangamba kang baka di masunod

Mga kautusan at aral ng Dios

Ay magtiwala kang tutulungang lubos

Nang iyong matupad Kaniyang mga utos

Habang may oras pa'y matanggap mo sana

Banal na bautismong itinuro Niya

Dahil kung ika'y patumpik tumpik pa

Pinto'y magsasara ika'y di nasok na

Sa iglesia ng Dios Siya tumatawag

Iglesiang sinulat ng mga alagad

Pag naramdaman mo ang Kaniyang pagtawag

Ika'y magmadali at sumunod agad 

Maiksi Lang ang Buhay (Mahabang tula para sa mga kabataan)

Mga kabataan dinggin niyo't pakinggan

Ito'y isang bagay na dapat malaman

Ito ay patungkol sa kapanahunan

Isipin mo ito't nang maintindihan

 

Ang buhay sa mundo ay sandali lamang

Oras lumilipas, di namamalayan

Ang ngayon bukas ay kahapon na lamang

Dumaang mabilis nang hindi mo alam

 

Kaya kabataan huwag nating sayangin

Ang bawat sandali na bigay sa atin

Ang bawat oras mo'y sa tama gamitin

Sa pagkakatulog ikaw ay gumising

 

Habang may panahon ay iyong mahalin

Ang mga magulang lumingap sa atin

Sa kanilang edad huwag nang pighatiin

Sa tigas ng ulo'y huwag dalamhatiin

 

Alalahanin mo mga hirap nila

Sa pagaaruga mula pagkabata

Sa araw at gabi'y laging alaala

Di mapagkatulog noong may sakit ka

 

Ang bawa't pagod sa paghahanapbuhay

Ang mahal na anak sa isip ang taglay

Ang tanging pangarap bago man humimlay

Ang sintang anak ay maayos ang buhay

 

Kaya kapatid ko dinggin mo ang payo

May katotohonang dapat mong matanto

Pansamantala lang ang buhay sa mundo

Ibuhos na ngayon ang pagmamahal mo

 

Di mo kailangang lahat ay subukin

Bisyo kasamaan at kalayawan din

Sa mga ito ay walang buting kamtin

Sa huli'y sarili din ang sisisihin

 

Sana'y piliin mo mga kabarkada

Tiyakin na mabuti impluwensiya nila

Sapagka't kung hindi'y mapapariwara

Sakit at hinagpis sa aba mong ina

 

Pahalagahan mo ang mas mahalaga

Dios una sa lahat saka ang pamilya

Ano bang puhunan ng yong kabarkada

Nang pinalaki ka'y may ambag ba sila?

 

Subalit ang ating ama't ating ina

Buhay pinuhunan nang mapalaki ka

Alalahanin mong nacaesarian pa siya

Maluwal ka lamang siya ay nagdusa

 

Ngayon nga na ika'y sadyang malaki na

Ang pakiusap ko'y tulungan mo sila

Pangarapin mo ring sila'y gumihawa

Wag nang pasakitan sa paglalakwatsa

 

Pusa man kung wala ay hinahanap din

Ang anak pa kayang pinakagigiliw

Kung gagabihin ka ay iyong sabihin

Nang di mag-alala at ika'y isipin

 

Pagbutihan mo ang iyong pag-aaral

At kung tapos ka na ay maghanapbuhay

Wag mong sasayangin ang buhay mong taglay

Dahilan lamang sa walang kuwentang bagay

 

Pag-inom ng alak paninigarilyo

Ika'y walang buting makukuha dito

Sakit lang sa bulsa at sakit ng ulo

Kung mamalasin pa'y masangkot sa gulo

 

Natural sa tao na siya'y suminta

Pilit mang pigilin darating talaga

Pakiusap ko lang sana'y magsabi ka

Upang kami sa 'yoy makapagpaalala

 

Isipin mong lahat ng sinasabi ko

Sundin mo ang lahat na sa yo ay payo

Mapapabuti ka yan ang tandaan mo

Kung tatalima ka't lalayo sa gulo

 

Maiksi ang buhay sa mundong ibabaw

Tao’y lilipas at pagdaka’y papanaw

Haharap sa Dios kapag huhukuman

Bawat mong ginawa ay pagsusulitan

Sugal (Isang tula)

Bisyong walang kuwenta at napakasama

Pagsasapalaran, pagsugal, pagtaya

Doon tinatapon maghapong biyaya

Asang mananalo at biglang titiba

Mga nagnanasa ng dagling pagyaman

Ay kapahamakan ang kahihinatnan

Pagka't iniimbot di pinaghirapan

At isinusugal ang pinagpagalan

At mayroon naman sobrang kahayukan

Ang pinangtataya ay pinangungutang

Sukdulang manloko makahuthot lamang

Ng ipatatalo doon sa sugalan

Sa panahon ngayon ay lalong madali

Na makapagsugal, mabuyo matali

Pagka't online sugal madaling sumali

Maghapong kinita doon nauuwi

Ang mga casino't iba pang sugalan

Malaking nagosyo, milyon ang kitaan

Ay nakadisenyo upang kaadikan

Habang inuubos iyong kayamanan

Para huwag mabuyo huwag mo nang simulan

Lakad ng masama ay huwag tutularan

Gumawang marangal, patas na lumaban

At ang pagsusugal ay iyong ilagan

Natira ay Yabang (Isang tula)

Bansang Pilipinas noong nakaraan

Ay angat sa iba mga katangian

Larangan ng sining pati karunungan

Ay di pahuhuli sa mga dayuhan

Subalit paglipas ng mga panahon

Rikit ay kumupas paghupa ng alon

Masamang ugali na ating natipon

Ang siyang wumawasak mahal nating nasyon

Ang crab mentality o utak talangka

Ayaw umasenso umunlad ang iba

Kapag sa tingin ay nauungusan siya

Pilit sisiraa't hilahin pababa

Ayos lang mahalin ang sariling atin

Huwag lamang sa puntong nakaririmarim

Na kahit mali na ay kakampi pa rin

Kahit kababayan tunay na salarin

Sa ating panahon ang daming tsismosa

Ugali'y manira ng buhay ng iba

Hahatid dadapit balitang madaya

Imahe ng kapuwa ay pinasasama

Sa edukasyon man ay iwan na tayo

Pero feeling pa rin pagkatatalino

Ang tingin sa iba'y pawang mga bobo

Kahit ang totoo ay siya ang tonto

Ang Filipino time isa pang malala

Usapang alas dos alas kwatro bigla

Kawalang respeto sa oras ng kapuwa

Pagkat nahirati na tumutulala

Marami sa atin ay naging judgemental

Humatol sa kapuwa ay wala ngang gatol

Kahit walang alam ang lakas ng tahol

Sa social media ay parang mga ulol

Sa'ng aspeto pa ba natira ang galing

Awitan at pageant at maging sa boxing

Sa ibang bansa man mahuhusay na rin

Yabang na nga lang ba natira sa atin?

Sa alin mang bansa na may mga tao

Na may takot sa Dios nagpapakatino

Ay dapat na tingnan na parepareho

Huwag tayong magtangi o mangdidispresyo

Ayos lang na tayo ay mapag-iwanan

Manatili lang sana na may kababaan

Pagka't pagkapangit lubhang kahambugan

Kung katotohanan ay mababa naman

Marayang Timbangan (Isang tula)

Isang masasabing gintong katangian
Walang dili iba kundi katapatan

Maging empleyado o nagbebenta man

Marapat taglayin tapat na timbangan

Huwag mong sasabihing tinda mo'y sariwa

Kung katotohanan ay ito'y bilasa

O original kamo ang gamit na benta

Nguni't ang totoo'y galing Divisoria

Mayro'ng pumapasok nagta-time-in lamang

Sa opisina ay pakape-kape lang

Hintay alas-singko oras ng uwian

Sasahod ng buo na may karayaan

Di raw mababasag kahit na pukpukin

Rolex niyang tinda tunay at genuine

Subalit nawasak matapos subukin

Baka tinamaan palusot ng sakim

Tayo ay magtapat sa 'ting hanapbuhay

Upang pagpalain ng Dios na nagbigay

Ang marayang sahod at marayang timbanga'y

Kasuklamsuklam nga at masamang bagay

Erieltheo103!