Pekeng balita = Fake News (Isang Tula)

Ang dala ay mali't huwad na pag-asa
Kung minsa'y salitang pampatay ng kapuwa
Mga kathang isip at mga hinala
Buong lakas loob ibinabalita

Panulat ng lilo na mamamahayag
Sa pahinang liko ay namamayagpag
Mga parokyano na kaniyang nalambat
Ang maling balita ay ikinakalat

Tayo ay mag-ingat pagdinig pagtanggap
Suriing mabuti mga nakakalap
Pagkat manloloko ngayon ay nagkalat
Kahit sa internet ay lumalaganap

Ang pinakamalala na pekeng balita
Ay bulaang pastor ang may dala-dala
Ampaw na pangakong sa langit pupunta
Habang mga tao'y pinapahamak niya

Gandang Kupas (Isang Tula)

Pambusog ng mata ang taglay na anyo
Ang tingin ng mata at galaw ng nguso
Mapanilong dilag masama ang puso
Ay gandang panglabas ang ipinang-aayo

Ngunit ang babaeng sa Dios ay may takot
Ang ginagayakan pagkataong loob
Ang kanyang katawan ipinaglilingkod
Sa utos ng Dios ay isinusunod

Ang gandang panlabas kusang kumukupas
Pag nagkakaedad rilag ay lilipas
Balat kukulobot dadami ang pekas
Di maitatago kahit mag-alahas

Huwag kang pabighani gandang panandali
Kung ayaw mong ika'y sa bitag mahuli
Lalo't kagandaha'y sa pinta binuli
Gumaganda lamang kapag gumagabi

Simple at natural iyan ang maganda
Di pilit na gandang produkto ng siyensiya
Padagdag ng ilong pabawas ng hita
Buwis buhay na ganda wala namang kuwenta

Huwag gawing basehan ang gandang panlabas
Kundi kagandahang hindi namamalas
Kagandahang loob sa puso ay pantas
At di ang babaeng kagandaha'y kupas

Tukso

Matamis ang lapit ng kalabang lilo
Animo ay pulot sa lupa ay tulo
Nguni't ang layunin ikaw ay ibuyo
Sa gawang masama ikaw ay isubo

Magandang babae o malaking pera
Ang anyo ng tukso ay makikilala
Kung ang nilalatag sa dilat mong mata
Ay tungo sa dilim ng gawang masama

Kung sa iyong buhay sumapit dumating
Na ikaw sa tukso ay ibig gibain
Ang Kaniyang pangako ay alalahanin
Kundi makakaya ay hindi darating

Kung sa 'yo'y tinulot dumating ang tukso
Paraang umiwas Kaniyang ituturo
Nang iyong matiis at kamting pangako
Kung makakalagpas ay laking palad mo

Kung mayroong ilang natangay nang husto
Di na bumalikwas ayaw nang magbago
Bakit nga suwail ang gagayahin mo
Masdan mo si Hesus nagbatang totoo

Upang huwag mahulog bitag ng masama
Sa anyo pa lamang ay umiwas ka na
Huwag pangatwiranan ang mumunting sala
Pagka't malalaki'y sa munti nagmula

Sahig at ang tuhod ganiyan lang kalapit
Dumaing sa Kaniya at iyong ilapit
Ika'y tutulungang sa aral kumapit
At kung makatiis marating ang langit

Puso

Puso

Ngiti at paggalang na usal sa labi

Mabubuting bagay na namumutawi

Ngunit natatagong sa loob ay sidhi

Ng pusong magaling maglingid magkubli

Hindi masusukat sa tindig at porma

Layuni'y dalisay o may dayang dala

Pagka't walang tao na makakakaya

Na puso'y arukin at mapagkilala

Puso ang simula masasamang gawa

Poot, pagnanakaw, pangangalunya

Kung di malilinis mapapariwara

Sapagka't ang puso totoong masama

Ngunit kung ang puso'y malinis dalisay

Tunay na bubuti tanang pamumuhay

Kung salita ng Dios, maimbak mataglay

Ito ang sa yo'y  sa tuwina'y gagabay

Mayro'ng isang taong mataas mayaman

Sa nilakhang lugar ay iginagalang

Nguni't kaniyang puso ay marumi naman

Sa harap ng langit walang kabuluhan

Sa kabilang banda ay may isang dukha
Nilalait-lait inaalimura
Ngunit kaniyang puso'y malinis sa Ama
Anong pagkabuti kalagayan niya

Mga asong sakim nanakmal ng dukha
Sa puting abito nagtago ng sala
Kung magpamarali'y banal manalita
Nguni't mga puso ay ubod ng sama

Ating mga puso maingatan nawa
Ilayo sa atin pakunwaring gawa
Gumawang matapat maging sa salita
Kung magtatagumpay kakamti'y biyaya

Pag-ibig Kabayan

Pag-ibig Kabayan

Bayang kasaysaya'y sinulat ng dugo
Ng kabayanihan at pagkakanulo
Sa dusa ng iba ang laya'y natamo
Kasarinlang sigaw ng lahing bilanggo

Tunay bang kalag na mga tanikala
Ng pagkaalipin ating mga diwa?
Pagka't kung tantuin tayo'y sikil pa rin
Sa sariling baya'y animong alipin

Alipin ng liko at palalong puso
Ng diwang mataas at tabil na nguso
Kapuwa'y pinapatay ng bugso ng puso
Pitik ng daliri ang siyang gatilyo

Kapuwa Pilipino nagpapataasan
Binababag kapuwang iba ang isipan
Pagka't hindi ibig ang napupusuan
Ang ganti'y tungayaw pag napupulaan

Isang gintong bagay sa ati'y nawala
Kaya ating lahi'y tila pariwara
Dili't ang pag-ibig na laan sa kapuwa
Hirap hagilapin sa puso ng madla

Pag-ibig kabayan dapat mong matanto
Ang pipigil sa 'ting mga pagtatalo
Kung mahal kita at mahal mo ako
Kapuwa igagalang mapiling iboto

Pinakamabuting ating magagawa
Iusal sa Dios lagay niyaring bansa
Na wag Niyang itulot sa sakim mapunta
Ang luklukang mahal ng pamamahala

Mga politiko darating yayaon
At mapapalitan sa anim na taon
Nguni't ang kapatid kaibigang laon
Makakadaupan mahabang panahon

Ang pamanhik ko po huwag tayong mag-away
Pagka't politika'y maliit na bagay
Sinomang maluklok, tayo ay dumamay
Gumawang mabuti at huwag maging tambay

Tula para sa mga may asawa

Tula para sa mga may asawa

Sa aking paglinga saan man magpunta
Ay may isang bagay laganap talaga
Pakikiapid at ang pangangalunya
Sa Pilipinas man o sa ibang bansa

Hindi na mabilang nasirang pamilya
Dahil sa paglabag sa utos ng Ama
Lalake't babae ay dapat magsama
Maliban na lang kung patay na ang isa

Kakatwa naman ang isa kong kilala
Kaya daw nag-abroad para sa pamilya
Subalit nang siya ay kumikita na
Nalimot ang dahil nang pag-alis niya

Bakit pagpapalit mo ang kaligtasan
Sa sangdaling aliw na dulot ng laman
Pagdating ng araw hindi mo ba alam
Ikaw ay haharap sa Dios na hukuman

Ang palaging talo sa ganitong gawa
Ay ang mga anak na iwan sa gitna
Kapag si lalake ay mayron nang iba
At si babae man iba na'ng pamilya

Kaya ang payo ko bawa't may asawwa
Matakot po sa Dios sundin ang utos Niya
Tratuhing sagrado ang pag-aasawa
Ang pagsira diya'y mayroong parusa

Kung hindi mo kaya na ika'y malayo
Hwag ka nang umabroad para iwas tukso
Kaysa may pera nga ngunit kalunyero
Impierno ang punta ng kaluluwa mo

At kayo naman po na kababaihan
Sa gawaing mali huwag pakasangkapan
Kung alam mo na ngang may pananagutan
Huwag mo nang tuksuhin at dikit-dikitan

Ang mga prostitute kung 'yong gagamitin
Ay sakit na tulo ang maaring kamtin
At kung minamalas ang 'yong sasapitin
AIDS na walang gamot sa iyo'y darating

Magkasiya ka na lang sa iyong asawa
Parehas din naman pag nakaraos na
Kaysa mambabae o manlalake ka
Ang kaluluwa mo'y mapapahamak pa

Para maingatan inyong pagsasama
Tamis ng pag-ibig huwag ninyong iwala
Hopiang pasalubong sa iyong asawa
Tulong pampatibay inyong pagsasama

Kung malayo naman po sa isa't isa
Chat tawag email huwag magpapabaya
Lagay ng asawa laging makumusta
At hindi lang kapag mayroong suweldo siya

Maraming salamat sa inyong pagbasa
Sana ay mapulot aral na maganda
Buhay may asawa magiging masaya
Kung magiging tapat lang sa isa't isa

Binulag ng Pangarap (Isang Tula)

Binulag ng Pangarap

Liwanag ng diwa mula pagkabata

Sa puso at isip kaniyang kinalinga

Ayaw na madumhan ng maling akala

Pilit nilalaban ang panig na tama

Ngunit nang lumaon ang mga panahon

Dahil sa pangarap isipa'y natuon

Ang paninindigang dati'y nakabaon

Ngayo'y nayayanig at ibig itapon

Hilaw na layuning ibig na abutin

Sumira ng budhing dati'y anong hinhin

Sukdulang kumampi sa panig ng dilim

Makamit niya lamang pangarap na bituin

Huwag tayong pabulag sa ating pangarap

Manindigan tayo sa tunay at tapat

Sandaling pagsikat maningning na kislap

Sa pagdapit hapon ay kusang aandap

Ngunit kung sa tama ay maninindigan

Ay mabuting wakas ang kahihinatnan

May pagtitiis at mga pagluha man

Tamis ng tagumpay ang sa 'yo ay laan