Awa (Isang tula)

Mahalagang bagay ang tila nawala

Sa maraming tao'y di na masambitla

Pawang malulupit sa gawa't salita

Nawaglit sa puso ang salitang "awa"

Ito ay panganib na pinagpauna

Sa kasulatan ay ating makikita 

Mga huling araw ay maglilipana

Mga walang habag malupit sa kapuwa

Yaong meron na siyang marami't sagana

Ay iniimbot pa ang lupa ng iba

Komo tuso at matalino siya

Pinekeng papeles ang pinangdaraya

Ang habag sa kapuwa'y napakahalaga

Upang tayo nama'y kaawaan Niya

Pagka't paghuhukom ay wala nga'ng awa

Du'n sa mga hindi nagpakita ng awa

Kung ibig nga nating tayo'y panahanan

Pag-ibig ng Ama ay ating makamtan

Ay huwag magkait sa nangangailangan

At makapag-abot sa da-pat tulungan

Kaya nga't ang aral sa mga mayaman

Huwag maging pag-asa ay ang kayamanan

Sa mabuting gawa ay maging mayaman

Nang tunay na buhay ay ating makamtan

Laking kapalaran tunay makakamtan

Ng mga sa dukha ay may awang laan

Pagka't mga ito'y muling babayaran

Ng Dios na tapat na Siyang Lumalang

May Dios na Lumikha (Isang tula)

Sa ating panahon ay may naglitawan

Ayaw maniwalang may Dios na lumalang

Na lahat ng bagay lumitaw na lamang

Na walang gumawa at aksidente lang

Pag aksidente ang pag-uusapan

Karaniwang pangit kinahihinatnan

Ngunit masdan mo mundo't kalawakan

Pawang nakaayos at pinag-isipan

Kung mayroong Dios ano ang pruweba?

Na Sya'y umiiral 'di man nakikita

Sa pamamagitan Kaniyang mga gawa

Mapatutunayang may Dios na Lumikha

Sa 'ting pagmamasid huwag ka nang lumayo

Tingnan mo't pagmasdan katawan mo't anyo

Sangkap ng katawan nasa tamang puwesto

Ang pagkakalagay ay sadyang pinlano

Masdan mo ang kilay saan makikita?

Inilagay ng Dios sa taas ng mata

Upang kung pawisan ay mayro'ng sasangga

Sapagka't kung wala sa pawis hilam ka

At gayon di naman ang mga daliri

Hindi pantay-pantay ang pagkakayari

Nguni't pag dadampot susubo ng kanin

Ay pantay-pantay na upang ipangkain

Tingnan mo ang mga puno at halaman

Carbon Dioxide ang kinakailangan

Ay nagpapalabas ng oxygen naman

Na kailangan naman tao at hayop man

Ang layo sa araw nitong ating mundo

Hindi sobrang lapit hindi sobrang layo

Kundi sakto lamang na mabuhay tayo

At may atmosperang proteksiyon ng tao

Ang mga bituin at mga planeta

May batobalaning pangontrol distansya

Ang mga ito ay di nagkakabangga

Pagka't nakaayos ang pagkakaporma

Tayong abang tao ay walang dahilan

Pilit mang itanggi piling mang tutulan

Mga gawa ng Dios pruweba't saligan

Na Siya'y umiiral Makapangyarihan

Mayro'ng isang tao isang atheista

Ang kaniyang nasambit nang mamatay na

Oh Dios ko, Oh Dios ang naisigaw niya

Bago niya hingit ang kaniyang hininga

Kaya nga samantalang may pagkakataon

Sumampalataya, maglingkod tumugon

Pagka't magsusulit du'n sa paghuhukom

Ang di kikilala sa ti'ng Panginoon

Huwag Maging Mapait (Isang tula)

Normal na matamis pag nag-uumpisa

Relasyon ng isang binata't dalaga

Kapag nag-uusap ayaw paawat pa

Lakbay ng malayo pag ibig magkita

Nguni't kapag sila'y kinasal nagsama

Ang tamis na ito'y dagling humuhupa

Pagka't unti-unti na nakikilala

Mga kapintasa't ugaling masama

Da bes na palagi gayak at postura

Pag nagliligawan mga sumisinta

Ligo araw-araw nagpapabango pa

At mabuti lamang ang pinakikita

Lalake't babae'y bukod na lumaki

Magkaibang ibang bahay kultura't ugali

Tapos magsasama kapag pinagtali

Dapat na mag adjust nang di maunsiyami

Kaya iniutos huwag maging mapait

Sapagka't panahon ang siyang susulit

Sa pagmamahalang sa puso'y inukit

At huwag mapalitan ng poot at galit

Pumapait kapag pag-ibig nawala

Kadalasa'y dahil nalipat sa iba

Ang dating maganda sa paningin niya

Ngayon sa paningin parang demonio na

Bakit iniutos na iyong ibigin

Kung mahal mo na siya bago pagsamahin

Pagka't ang masama hahasik ng lagim

Upang mag-asawa ang kaniyang wasakin

Kaya't kahit na nga maraming magbago

Tumaba, pumangit at mag-ibang anyo

Banal na pagibig ingatan sa puso

Asawa'y ibigin nang dahil kay Cristo

SaBong (Isang tula)

Yaring politika dito sa 'ting bansa

Ang kanyang kapara ay isang sarsuwela

Na di na malaman kung sino ang bida

Pagka't balimbinga't baligtaran sila

Masasamang tao na ang diwa'y liko

Libanga'y manira't maghasik ng gulo

Magkabilang panig ay pinagtatalo

Mga pekeng balita ang inilalako

Sa bayan na sadyang magulo'ng eleksiyon

Lalong lumalala sa udyok at gatong

Mga mamamayan ay pinagsasabong

Ng kumikita sa pekeng impormasyon

Nang maging mapalad ang dapat magawa

Tayo'y nararapat na mapagpayapa

Ang nagkakaalit pagbatiin kapuwa

Upang alitan ay hindi lumala

Nguni't ang ganito'y hindi makukuha

Kung di sa sarili ay magsisimula

Kung palaging away ang hanap ng madla

Walang magbabago walang magagawa

Kaya't sa susunod tayo'y makakita
Ng nakakagalit na mga balita
Ay mag-isip muna bago magsalita
Maging embahador pagiging payapa

Oras (Isang tula)

Bente kwatro oras buong isang araw

Ang bigay sa atin kumilos gumalaw

Pa'no gugugulin magpapasya'y ikaw

Ikaw ang pipili dilim ba o ilaw?

Sa hanapbuhay ba ubos iyong oras?

Doon na lamang ba laan buong lakas?

Sa pagsunod sa Dios ika'y tumatakas

Pagka't iniisip marami pang bukas

Ang araw ng bukas hindi natin batid

Hiningang marupok dagling napapatid

Kailan babalikwas ano ang balakid?

Sa kaunting kita Dios ba'y pagpapalit

Alalahanin mong sa Dios natin hiram

Ang maiksing oras mo sa sanglibutan

Siya ang nagbibigay ng lakas at yaman

Marapat nga lamang nating paglingkuran

Ang maghanapbuhay di naman masama

Basta't h'wag limutin sa ati'y Lumikha

Ang Kaniyang katuwiran ay hanapin muna

Iba pang mga bagay ay idaragdag Niya

Kaya nga't panahon ay samantalahin

Pagka't masasamang araw dumarating

Dakilang tungkulin ay ating tuparin

Dili't mga utos na bigay sa atin

Samantalang tayo'y may pagkakataon

Gumawang mabuti sa tawag tumugon

Pagkat sa libingan walang mababaon

Walang magagawa hindi na aahon

Ba't Ako? (Isang tula)

 'Bat ako, bat ako?' ang sagot sa nanay
Batang nautusan sa gawaing bahay
Ang inang napagod paghahanapbuhay
Ang apuhap lamang ay munting karamay

Ano nga bang sagot sa tanong na ito?
Matamang pakinggan, makinig, matuto
Upang sa susunod, may iutos sa iyo
Ay 'di sumimangot, tumulis ang nguso

Alamin mo ito, ikaw ay tatanda
Darating ang araw, ay mauulila
Ngunit kung sa bahay, 'di alam gumawa
Ikay mamaho na nakatunganga

Gamitan mo na lang ng kaunting awa

Mga magulang mong hapo sa paggawa

Gising ng maaga uuwing gabi na

At magulong bahay ang mararatnan pa

Darating ang araw ikaw ay bubukod

Kung mag-aasawa o kaya'y aabroad

Kung hindi natutong sa bahay kumilos

Ang sasapitin mo ay kalunoslunos

Ang ika'y matuto munting obligasyon

Maglinis, magluto maglabang pantalon

Mga kaalamang iyong mababaon

Iyong magagamit sa habang panahon

Kaya't sa susunod na ika'y utusan

"Bat ako, 'bat ako? ay huwag nang maturan

Matutong magkusa nang pakinabangan

At makalugod ka sa iyong magulang

Tsismis (Isang tula)

Ang dala ng taong budhi ay masama

Ng hatid dumapit makati ang dila

Ay kabulaanan at pekeng balita

Masarap na subo sa taingang nadaya

Ang mga tsismoso kung mangagsalita

Sila ang magaling lahat ay masama

Laging bukambibig ay pintas sa kapuwa

Ang sariling dumi ay kubli sa madla

Tunay na walang matuwid sa lupa

Gumawang mabuti't di nagkakasala

Nguni't mga tabil ang kalkal sa tuwina

Ay sablay ng iba at maling nagawa

Ang Diyos na sakdal di nagkakasala

Marunong lumimot ng sa taong sala

Kapag pinatawad nilimot na Niya

At di na muling inaalala pa

Sa kabilang banda ang hatid dumapit

Ang mali ng iba, pilit binabalik

Nag-iimbento pa ng kuwentong pilipit

Sa pagsasalita ay galit na galit

Ang mga tsimosa ay naghihiwalay

Magkakaibigan ay pinag-aaway

Huwag tayong pumayag na maging kaaway

Ang Dios na sa 'ti'y nagbibigay buhay

Saan ka dadalhin dilang tampalasan

Kung sa paninira ika'y mananangan

Ang kahihinatnan ay kapahamakan

Kapag nahiwalay sa Dios na bayan

Lisensiya (Isang tula)

Lisensiyang nakuha sa daya ng pera

Udyok ng tiwali sa likong ahensiya
Di na kailangang ika'y subukin pa
Mapag-uusapan sa tamang halaga

Masamang epekto, ganitong gawain

Ay sa mismong araw hindi mapapansin

Kundi sa paglabas opisinang sakim

Panganib na taong pagmamanehohin

Maraming kamote ngayon sa kalsada

Na nagsisibiyahe kahit di pumasa

Sa batas trapiko ay bobo at tanga

Mabibisto na lang pag nakadisgrasya

Matagal nang korap naturang tanggapan

Ilang namumuno nasa kadiliman

Tanging iniisip pagkakakitaan

Pambili sa plaka, di na matagpuan

Kailan titino ang ating kalsada

Kung di magbabago nagpapalisensiya

Hanggang may kawatan mahirap umasa

Na titino agad ang ating sistema

Ang ating pag-asa sila'y makonsiyensiya

Ngayong sunod-sunod ang mga disgrasya

Batang naulila't amang nagluluksa

At mga kaaanak na nagdaralita